SOLIDARITEIT: Hoe om ʼn werksonderhoud te benader en te hanteer

ʼn Werksonderhoud is uit die aard van die saak ʼn gesprek tussen ʼn voornemende werkgewer en ʼn kandidaat. Dit is ʼn evalueringsgesprek. Aan die hand van voorafgekose kriteria word die beste kandidaat gekies. Die sleutelterm is “evaluasie.” Evaluasie behels onder meer vrae waarop die kandidaat moet reageer. Vraag-antwoord-voorbereiding is ʼn kritieke suksesfaktor vir enige kandidaat. Dit verg oefening om vlot te wees in die beantwoording van vrae want ʼn werksonderhoud kan nogal angswekkend wees. Alhoewel voorafoefening baie help, bly spontaniteit en eerlikheid die beste beleid.