Via Afrika Sepedi HL Grade 11 Study Guide

Morutwana, pukutlhahla ye e ngwadilwe ka nepo ya go go tšea kgato ka kgato
leetong la go ithuta polelo ya gae ka mphatong wa 11. Maikemišetšo ke go go swara
ka seatla, re go budulle mahlo go go nolofaletša lenaneothuto le kelo. Mehla le
mabaka di a fetoga. Go bjalo le go thuto ka nageng ya gešo. Diphetogo tše di
theilwe godimo ga molaotheo wa naga ya rena ya Afrika-Borwa. Maikemišetšo a
setatamente sa pholisi sa lenaneothuto le kelo se go fa tlhagišo ya seo se bonwago
e le tsebo, mabokgoni le meetlo ye e swanetšego go rutwa mo dikolong tša AfrikaBorwa. Lenaneothuto le le ikemišeditše go netefatša gore barutwana ba diragatša le
go ikgobokeletša tsebo le mabokgoni ka tsela yeo e kwešišegago mo maphelong a
bona, ka go realo, lenaneothuto le hlatloša tsebo ya motheo ya tikologo ya selegae,
mola le hlokometše kamego ya ditaelo tša boditšhaba.